पांडुरंगा ..! यंदा एसटीचीही ‘ वारी’ हुकली रे बाबा

राहुरी  ः वेबटीम      आषाढी एकादशी अवघ्या एका आठवड्यावर आली असली तरी नगर जिल्ह्यातून अद्याप एकही एसटी पंढरीला गेली नाही. तीस जूनपर्यंत ज...

राहुरी  ः वेबटीम     

आषाढी एकादशी अवघ्या एका आठवड्यावर आली असली तरी नगर जिल्ह्यातून अद्याप एकही एसटी पंढरीला गेली नाही. तीस जूनपर्यंत जिल्हाबंदीचे आदेश असल्यामुळे आगामी काळातही पंढरीला वारकऱ्यांना घेऊन एसटी जाण्याची शक्यताही नाही. त्यामुळे यंदा करोनामुळे आषाढी यात्रेच्या माध्यमातून दरवर्षी मिळणारे कोट्यवधींचे एसटी महामंडळाला मिळणार उत्पन्न बुडणार आहे.
आषाढी एकादशी निमित्ताने राज्यभरातून वारकरी आपल्या लाडक्या विठूरायाच्या भेटीसाठी जातात. काहीजण पायी पंढरीला जातात व येताना एसटीने येतात . तर, काही वारकरी हे येण्या-जाण्याचा प्रवास एसटीने करतात. नगरमधून दरवर्षी लाखो वारकरी एसटीने पंढरीला जात असतात. या वारकऱ्यांच्या सोयीसाठी आषाढी एकादशी जवळ येताच जवळपास दहा दिवस अगोदर एसटी महामंडळ जादा बसेस पंढरपूरसाठी सोडत असते. मागील वर्षाची आकडेवारी लक्षात घेतल्यास आषाढी काळात दहा दिवसांमध्ये नगरमधून पंढरपूर साठी अडीचशे गाड्या सोडण्यात आल्या होत्या.
 ह्या गाड्यांनी नगर ते पंढरपूर अशा जवळपास दीड हजार फेऱ्या केल्या होत्या. यामधून एसटीला १ कोटी ३५ लाख रुपयांचे उत्पन्न मिळाले होते. यंदा मात्र आषाढी एकादशी अवघ्या एक आठवड्यावर आली असली तरी अद्याप एकही गाडी पंढरपूरला गेली नाही. तसेच सध्याची परिस्थिती पाहता एकादशीपर्यंत एसटी बस पंढरपूरला जाण्याची शक्यताही नाही. त्यामुळे आषाढी एकादशीच्या काळात मिळणारे एसटी महामंडळचे केवळ नगर विभागाचे जवळपास एक ते दीड कोटीचे उत्पन्न बुडणार आहे.
आषाढी एकादशीसाठी पंढरपूरला जाण्यासाठी कोणालाही प्रवास करण्याचा पास देऊ नये, असे निर्देश जिल्हा प्रशासनाला देण्यात आले आहेत. त्यामुळे प्रशासकीय यंत्रणा सतर्क झाली आहे तसेच प्रशासनातील अधिकाऱ्यांकडे दिंडीला परवानगी मिळू शकेल का, याबाबत विचारणा सुरु झाली आहे.