सहा लाखांच्या 400 दूध पावडर गोण्यांवर चोरट्यांचा डल्ला ; वाचा कुठं झाली चोरी

नेवासा ः वेबटीम  एकीकडे  दुधाचे भाव ढासळले असताना शेतकरी हवालदिल झाले आहेत. तर दुसरीकडे   नगर जिल्ह्यात चक्क  साडेसहा लाख रुपयांच्या  ३५...

नेवासा ः वेबटीम 

एकीकडे  दुधाचे भाव ढासळले असताना शेतकरी हवालदिल झाले आहेत. तर दुसरीकडे   नगर जिल्ह्यात चक्क  साडेसहा लाख रुपयांच्या  ३५० ते ४०० दूध पावडरच्या गोण्यांवरच चोरांनी डल्ला मारला आहे.  शिंगवे तुकाई ( ता. नेवासा) येथे ही घटना घडली आहे.  

शिंगवे तुकाई येथे असणाऱ्या एमआयडीसी परिसरात शेख अब्दुल अजीज जैनुद्दीन यांच्या मालकीचे गोदाम आहे. या गोदामात त्यांनी दूध पावडरचा साठा ठेवला होता. हे गोदाम बंद होते. हीच संधी साधून चोरट्यांनी गोदामाच्या लोखंडी शटरची लॉकची पट्टी कापली आणि कुलूप तोडून आतमध्ये प्रवेश केला. त्यानंतर गोदामातील साडेतीनशे ते चारशे दूध पावडरच्या गोण्या चोरून नेल्या. हा प्रकार ९ जुलै ते १३ जुलै या काळात घडला आहे. गोदामातील दूध पावडरच्या गोण्या चोरीला गेल्याचे लक्षात आल्यानंतर शेख यांनी तातडीने याबाबतची माहिती पोलिसांना दिली. त्यानंतर घटनास्थळी उपविभागीय पोलीस अधिकारी मंदार जावळे, सहाय्यक पोलीस निरीक्षक जनार्धन सोनवणे यांनी भेट देऊन पाहणी केली व शेख यांनी दिलेल्या फिर्यादीवरून सोनई पोलीस ठाण्यात गुन्हा दाखल करण्यात आला आहे. चोरीला गेलेल्या दूध पावडरची किंमत साडेसहा लाख रुपये इतकी आहे. या प्रकरणी अधिक तपास सहाय्यक पोलीस निरीक्षक जनार्धन सोनवणे करीत आहेत.
  याआधी गेल्या वर्षी नोव्हेंबरमध्ये चाकण पोलीस ठाण्याच्या हद्दीत दूध पावडर चोरीला गेली होती. गोदामाचे शटर कापून चोरट्यांनी आठ लाख १२ हजार ५०० रुपये किंमतीच्या १३० दूध पावडरच्या बॅग चोरून नेल्याचा प्रकार उघडकीस आला होता. कुरुळी (चाकण) येथे ही घटना घडली होती. बिरेंद्रसिंग गुसावीसिंग भंडारी (वय ४९, रा. मोशी प्राधिकरण) यांनी या प्रकरणी चाकण पोलीस ठाण्यात फिर्याद दिली होती. चाकणजवळ कुरुळी येथे ग्रेव्हिस फूड्स प्रा. लि. या कंपनीचे गोदाम आहे. बिरेंद्रसिंग ग्रेव्हिस फूड्स कंपनीत नोकरी करतात. त्यांनी गोदामाला कुलूप लावले होते. चोरट्यांनी गोदामाचे कडीकोयंडे गॅस कटरने कापून आत प्रवेश केल आणि वारणा डेअरी कंपनीच्या दूध पावडरच्या आठ लाख १२ हजार ५०० रुपये किमतीच्या १३० बॅगा चोरून नेल्या होत्या.