व्हिडीओ व्हायरल झाला आणि सावकाराचे बिंग फुटले

अहमदनगर:  बेकायदा सावकरी कर्ज वसुलीसाठी महिलेला मारहाण करतानाचा व्हिडिओ व्हायरल झाल्यामुळे सावकाराचे बिंग अखेर फुटले. सहकार विभागाने केल...

अहमदनगर: 

बेकायदा सावकरी कर्ज वसुलीसाठी महिलेला मारहाण करतानाचा व्हिडिओ व्हायरल झाल्यामुळे सावकाराचे बिंग अखेर फुटले. सहकार विभागाने केलेल्या चौकशीनंतर पारनेर तालु्क्यातील प्रकाश हरिभाऊ कोठावळे ऊर्फ पिंटु सावकार याच्यावर बेकायदेशीर सावकारी केल्याचा गुन्हा दाखल केला आहे.   

.पारनेर तालुक्यातील जवळे येथील एका महिलेला मारहाण करतानाचा एक व्हिडिओ व्हायरल झाला होता. एका सावकाराने त्या महिलेला ऑक्टोबर महिन्यात १२ हजार रुपयांचे कर्ज दिले होते. त्याच्या बदल्यात सुमारे ९५ हजार रुपयांची वसुली करूनही पैशासाठी मारहाण होत असल्याची तक्रार त्या महिलेने केली होती. उरलेल्या साडेसात हजार रुपयांसाठी ही मारहाण झाल्याचा दावा करण्यात येत होता. हा व्हिडिओ व्हायरल झाल्यावर सर्व स्तरांतून संताप व्यक्त केला गेला. सहकार विभागाने त्याची दखल घेऊन त्याअनुषंगाने आलेल्या तक्रारीची चौकशी केली. एक मे २०२० रोजी ही घटना घडली होती. सुरवातीला महिलेच्या तक्रारीकडे दुर्लक्ष झाले होते. मात्र, व्हिडिओ समोर आल्याने प्रकरण गांभीर्याने घेण्यात आले. लोकजागृती सामाजिक संस्थेनेही याचा पाठपुरावा केला. त्यानंतर सहकार विभागाने छापा घालून पुढील कारवाई कारवाई सुरू केली. त्यामध्ये तथ्य आढळून आले. हा सावकार शक्यतो महिलांनाच कर्ज देत असे. वसुलीसाठी आपल्या पत्नीचा वापर करत असल्याचे आढळून आले. विविध संस्थांकडून कमी व्याज दराने मि‌ळणारे कर्ज घेऊन त्या आधारे जास्त व्याज मिळविण्याची बेकायदा सावकारी करीत असल्याचे आढळून आले. सहकार विभागातील अधिकारी तात्याभाऊ भोसले यांनी पारनेर पोलीस ठाण्यात गुन्हा दाखल केला आहे.