शिर्डी संस्थानच्या विश्वस्तपदासाठी जिल्ह्यांतून इच्छुकांची भाऊगर्दी

राहूरी(श्रीकांत जाधव)  लाखो भाविकांचे श्रद्धास्थान असलेल्या शिर्डी साईबाबा संस्थान विश्वस्त मंडळ नेमण्याचे निर्देश उच्च न्यायालयाने महाविकास...

राहूरी(श्रीकांत जाधव)

 लाखो भाविकांचे श्रद्धास्थान असलेल्या शिर्डी साईबाबा संस्थान विश्वस्त मंडळ नेमण्याचे निर्देश उच्च न्यायालयाने महाविकास आघाडी सरकारला दिले असल्याने संस्थांनच्या अध्यक्षपदासाठी राष्ट्रवादी काँग्रेस व काँग्रेस यांच्यात जोरदार रस्सीखेच सुरू असून अनेकांची नावे समोर आली असून उपाध्यक्षपद शिवसेनेला मिळणार असल्याचे समजते.

सन २०१४ साली राज्यात भाजप- सेनेची सत्ता आल्यानंतर साई संस्थानवर  भाजप आणि सेनेच्या नेत्यांची वर्णी लागली.  यावेळी संस्थानचे अध्यक्षपद आणि उपाध्यक्ष पदावर भाजपची वर्णी लागल्याने शिवसेनेने नाराजी व्यक्त केली होती.  दरम्यान २२ जून पर्यंत उच्च न्यायालयाने महाविकास आघाडी सरकारला नवीन विश्वस्त  नेमण्या संदर्भात आदेश दिल्याने सरकारमध्ये मोठ्या प्रमाणात खलबते सुरू झाली आहे.

राज्यात सेना, राष्ट्रवादी व काँग्रेस या तिन्ही पक्षाचे मिळून महाआघाडी सरकार असून मुंबई येथील सिद्धिविनायक देवस्थानचे अध्यक्षपद सेनेकडे असल्याने साहजिकच शिर्डी संस्थांनचे अध्यक्षपद राष्ट्रवादी काँग्रेस अथवा काँग्रेस यांच्याकडे दिले जाणार आहे. या दोन्ही पक्षात अध्यक्षपदावरून जोरदार रस्सीखेच सुरू आहे. जिल्ह्यात राष्ट्रवादी काँग्रेसचे आमदार जास्त असल्याने त्यांनी अध्यक्षपदासाठी दावा केला आहे. काँग्रेसही अध्यक्षपदासाठी आग्रही आहे.

 दरम्यान राष्ट्रवादी काँग्रेसकडून अध्यक्ष पदासाठी आ.रोहित पवार, आ.आशुतोष काळे, आ.निलेश लंके यांची नावे आघाडीवर आहेत. तर काँग्रेसकडून महसूलमंत्री बाळासाहेब थोरात यांचे मेहुणे आ.सुधीर तांबे व भाचे सत्यजीत तांबे यांची नावे चर्चेत आहेत.

  शिर्डी संस्थानचे उपाध्यक्षपद शिवसेनेकडे जाणार असून रवींद्र मिर्लेकर यांचे जवळपास फायनल असून विश्वस्त पदासाठी जिल्ह्यातील  शिर्डी, कोपरगाव, कोपरगाव, संगमनेर येथील सेना पदाधिकारी यांना संधी दिली जाणार असून त्यादृष्टीने सेनेच्या वरीष्ठ पातळीवरून चाचपणी सुरू आहे. 

राहूरी तालुक्यातून शिवसेना उत्तर नगर जिल्हाप्रमुख रावसाहेब खेवरे यांचे तर राष्ट्रवादीकडून माजी विश्वस्त तथा प्रेरणा उद्योग समूहाचे अध्यक्ष सुरेश वाबळे यांचे नाव विश्वस्त पदासाठी अंतिम असल्याचे सूत्रांकडून समजते.  सेना, राष्ट्रवादी व काँग्रेस  विश्वस्त पदासाठी जिल्ह्यातील पदाधिकारी यांना संधी दिली जावू शकते. तिन्ही पक्ष राज्यातील वरिष्ठ पदाधिकाऱ्यांना नवीन विश्वस्त मंडळात संधी देण्यासाठी आग्रही आहेत. 

  एकंदरीत शिर्डी संस्थानच्या अध्यक्ष व उपाध्यक्षपदाची माळ कोणाच्या गळ्यात पडणार व कोणाकोणाला विश्वस्त पदाची लॉटरी लागणार हे येत्या काही दिवसात समोर येणार आहे.

विश्वस्त पदासाठी यांची नाव चर्चेत

प्रशांत गडाख(नेवासा),रावसाहेब खेवरे(राहूरी), राजेंद्र फाळके(कर्जत), राजेंद्र झावरे(कोपरगाव), करण ससाणे(श्रीरामपूर),चेतन लोखंडे(श्रीरामपूर), हेमंत ओगले(श्रीरामपूर), किरण काळे(नगर), सुरेश वाबळे(राहूरी), शशिकांत गाडे(नगर), कमलाकर कोते(शिर्डी), राजेंद्र पठारे(राहाता), सचिन कोते(शिर्डी), सुधाकर शिंदे(शिर्डी),रमेश गोंदकर(शिर्डी), महेंद्र शेळके(शिर्डी), डॉ.एकनाथ गोंदकर(शिर्डी), संग्राम कोते(शिर्डी), अनिता जगताप( शिर्डी), निलेश कोते(शिर्डी) याशिवाय राज्यातील तिन्ही पक्षाचे अनेक पदाधिकारी इच्छुक आहेत.