देवळाली प्रवरात निवडणूकी पेक्षा निर्णय अधिकाऱ्यांची चर्चा; अर्ज बादप्रकरणी उमेदवार न्यायालयात

देवळाली प्रवरा / वेबटीम:- देवळाली प्रवरा नगर पालिकेची स्थापना फेब्रुवारी १९८३ मध्ये झाली असून गेल्या ४२ वर्षांत नगर पालिकेच्या अनेक निवडणुका...

देवळाली प्रवरा / वेबटीम:-

देवळाली प्रवरा नगर पालिकेची स्थापना फेब्रुवारी १९८३ मध्ये झाली असून गेल्या ४२ वर्षांत नगर पालिकेच्या अनेक निवडणुका शांततेत पार पडल्या. मात्र यावर्षीच्या सार्वत्रिक निवडणुकीत राजकीय चर्चेपेक्षा निवडणूक निर्णय अधिकारी वर्षा पवार यांच्या कार्यपद्धतीची चर्चा अधिक रंगत आहे. उमेदवार, नागरिक, पोलिस, नगर पालिकेचे कर्मचारी आणि पत्रकारांशी उद्धट वागणूक, तसेच छाननीदरम्यान योग्य संधी न देता मोठ्या प्रमाणावर अर्ज बाद केल्याच्या आरोपांनी निवडणूक वातावरण तापले आहे.

छाननी प्रक्रियेत नगरसेवक पदाचे तब्बल ३९ अर्ज तर नगराध्यक्ष पदासाठी दाखल ५ अर्ज बाद करण्यात आले आहेत. या निर्णयाविरोधात विविध पक्षांच्या उमेदवारांनी थेट संभाजीनगर उच्च न्यायालयात याचिका दाखल केली आहे. उमेदवारांचे म्हणणे ऐकून न घेता त्यांचे अर्ज बाद केल्याचा आरोप त्यांनी केला आहे.

या प्रकरणी वंचित बहुजन आघाडीचे जिल्हाध्यक्ष संतोष चोळके यांनी जिल्हा निवडणूक निर्णय अधिकाऱ्यांकडे तक्रार दाखल केली असून वर्षा पवार यांची देवळाली प्रवरा नगर पालिकेच्या निर्णय अधिकारी पदावरून हकालपट्टी करावी, अशी मागणी केली आहे.

देवळाली प्रवरात गेल्या चार दशकांत सर्वच राजकीय पक्षांनी खेळीमेळीच्या वातावरणात निवडणूक प्रक्रिया पार पाडण्याची परंपरा जपली आहे. निवडणुकीपूरते राजकीय मतभेद असूनही मतदानानंतर सर्व पक्षांचे नेते व कार्यकर्ते एकत्र येऊन मैत्रीदर्शक कार्यक्रम साजरा करण्याची परंपरा आजही कायम आहे. मात्र यंदाच्या निवडणुकीत निर्णय अधिकाऱ्यांच्या कठोर आणि ताठर भूमिकेमुळे ही शांततेची परंपरा धोक्यात आल्याची भावना नागरिक व्यक्त करत आहेत.

दरम्यान, १८ नोव्हेंबर रोजी दुपारी १:५० वाजता निवडणूक आयोगाने अचानक नवीन अध्यादेश जारी केला. पर्यायी उमेदवारांकडे पाच सुचक नसल्यास त्यांचे अर्ज बाद करण्याचा आदेश काढण्यात आला. या निर्णयामुळे अनेक उमेदवारांचे अर्ज अवैध ठरले. “ही सूचना अर्ज भरण्यापूर्वी दिली असती तर सुचक जोडणे शक्य झाले असते,” अशी खंत उमेदवारांनी व्यक्त केली आहे. त्यामुळे या अध्यादेशाविरोधातही न्यायालयाचा मार्ग अवलंबण्याशिवाय पर्याय नसल्याचे उमेदवार म्हणत आहेत.

पत्रकारांनाही निर्णय अधिकारी माहिती वेळेत न देणे, दुर्लक्ष करणे, अशा तक्रारी येत आहेत. या संपूर्ण प्रकरणामुळे देवळाली प्रवरात निवडणूक प्रक्रिया वादग्रस्त ठरत असून संबंधित अधिकारी बदलण्याची मागणी जोर धरत आहे.