मला शिवाजी व्हायचंय, शिवचरित्रकार हसन सय्यद यांचे रायगड जिल्ह्यातील पेन येथील विद्यार्थ्यांसाठी प्रेरणादायी शिवव्याख्यान*

रायगड(वेबटीम)   छत्रपती शिवाजी महाराजांच्या पदस्पर्शाने पावन झालेल्या रायगड जिल्ह्यातील पेन येथे, एकात्मिक आदिवासी विकास विभाग, पेन प्रकल्प ...

रायगड(वेबटीम)

  छत्रपती शिवाजी महाराजांच्या पदस्पर्शाने पावन झालेल्या रायगड जिल्ह्यातील पेन येथे, एकात्मिक आदिवासी विकास विभाग, पेन प्रकल्प यांच्या वतीने शासकीय आश्रमशाळेतील विद्यार्थ्यांसाठी “शिवचरित्रातून प्रेरणादायी शिवव्याख्यान” या कार्यक्रमाचे आयोजन करण्यात आले आहे. विद्यार्थ्यांच्या जीवनात राष्ट्रभक्ती, आत्मविश्वास आणि चारित्र्यनिर्मितीची मूल्ये रुजवण्याच्या उद्देशाने हा उपक्रम राबविण्यात येत आहे.

या कार्यक्रमात शिवचरित्रकार व समाजप्रबोधनकार हसन सय्यद हे विद्यार्थ्यांना छत्रपती शिवाजी महाराजांच्या जीवनातील विविध प्रेरणादायी प्रसंगांच्या माध्यमातून मार्गदर्शन करणार आहेत. अल्पवयात स्वराज्याची शपथ घेणारे शिवाजी महाराज, प्रतिकूल परिस्थितीतही न डगमगणारे त्यांचे अपार धैर्य, योग्य वेळी अचूक निर्णय घेण्याची नेतृत्वक्षमता, तसेच प्रजेच्या हितासाठी घेतलेले लोककल्याणकारी निर्णय — या सर्व बाबी विद्यार्थ्यांसमोर प्रभावीपणे मांडल्या जाणार आहेत.

महाराजांनी बलाढ्य शत्रूचा सामना करताना दाखवलेले अद्वितीय धैर्य, आग्र्याहून सुटकेच्या प्रसंगी दाखवलेली असामान्य बुद्धिमत्ता व रणनीती, तसेच शेतकरी, महिला आणि सर्वसामान्य जनतेबाबत दाखवलेला सन्मान, न्यायप्रियता व संवेदनशीलता — ही उदाहरणे आजच्या पिढीसाठी दिशादर्शक ठरणारी आहेत. छत्रपती शिवाजी महाराजांचे नेतृत्व हे केवळ युद्धकौशल्यापुरते मर्यादित नसून, ते शिस्त, नियोजन, समावेशकता, माणुसकी आणि उत्कृष्ट प्रशासनावर आधारित होते, यावर या व्याख्यानात विशेष भर दिला जाणार आहे.

विद्यार्थ्यांच्या जीवनात शिवविचार, शिवसंस्कार, शिस्त, प्रामाणिकपणा, स्वाभिमान आणि राष्ट्रनिष्ठा रुजवणे हा या व्याख्यानाचा मुख्य हेतू आहे. अभ्यासाबरोबरच चारित्र्यघडणीचे महत्त्व अधोरेखित करत, “मला शिवाजी व्हायचंय” हा विचार विद्यार्थ्यांच्या मनात रुजवण्याचा प्रयत्न या उपक्रमातून केला जाणार आहे.

हे प्रेरणादायी शिवव्याख्यान शुक्रवार, दिनांक १६ जानेवारी २०२६ रोजी सकाळी ठीक ११ वाजताएकात्मिक आदिवासी विकास विभाग, पेन प्रकल्प, जिल्हा रायगड येथे आयोजित करण्यात आले आहे.

या कार्यक्रमास आयएएस अधिकारी, आयुक्त, प्रोजेक्ट ऑफिसर, विविध शासकीय अधिकारी व कर्मचारी, तसेच पालक, शिक्षक, विद्यार्थी, शिवप्रेमी नागरिक आणि समाजातील विविध स्तरांतील मान्यवर मोठ्या संख्येने उपस्थित राहणार असल्याची माहिती आयोजकांच्या वतीने देण्यात आली आहे.